Kit Chan
米白色綴針織領 bomber jacket$25,950
米白色針織背心$5,350
米白色半截長裙$15,350
all Bottega Veneta

cover face

I Have Nothing To Lose 陳潔儀

陳潔儀,新加坡歌手,因為〈心痛〉、〈擔心〉,還有《妙手仁心 II》才為香港樂迷所認識。
最近為她揪心的,是去年上《我是歌手 3》時,被指翻唱〈心如刀割〉「全場都在走音,要靠後期修音」後,引起網民熱話。
喂喂喂,如果那是 Twins的演唱會的錄音唱片,真的不太覺得有問題,但這位是很久很久前已跟張學友晚晚唱《雪狼湖》的陳潔儀喎,難得她反過來安慰我:「我冇乜野心,得失唔會睇得太重。
「內地朋友都唔識我, I have nothing to lose。我上去只係想分享唱歌係點樣嘅,你鍾意嘅咪鍾意,最多咪返屋企(新加坡)。」


Profile
 

陳潔儀( Kit Chan)
出生日期: 1972年 9月 15日(處女座)
出生地:新加坡
身高: 5呎 6吋
體重: 110磅
語言:廣東話、普通話、英語及法語。
學歷:拉薩爾藝術學院戲劇表演學系
簡歷: 89年參加學校舉辦校際詞曲創作比賽,並開始參與唱廣告歌。 93年以學生身份在英國皇室愛德華王子御前獻唱,獲得唱片公司賞識邀約做歌手,同年推出首張唱片《不要傷了和氣》。
主要作品:唱片《不要傷了和氣》( 93),《心痛》( 94),《揭曉》( 97),《麻醉》( 01)、《重譯》( 11)。電視劇《妙手仁心 II》( 00)。舞台劇《雪狼湖》( 97)、《漫步人生路》( 98)、《紫禁城:慈禧太后的肖像》( 02)、《愛情有什麼道理》( 03)、《雨季》( 10)。
微博: http://weibo.com/u/5393756108


隨浪
 

Kit Chan
粉色孖襟西裝(未定價)
Bally

大抵有不成文規定,內地歌唱比賽冠軍都是「自己人」,海外朋友實屬陪跑一族,我問陳潔儀何需上內地受靶?
「我一直唔認同歌手之間比賽嘅!洪濤(《我》節目總導演)搵咗我三次,亦覺自己冇喺內地發展過,唔知會有乜嘢反應,佢同我講:『你相信我,大家都會愛你。』我問:『你怎能知道?』。」
究竟一種怎樣的計算才可雙贏,也要你能否看得透「比賽不過是一場 show」。正如,不愛玩 social media的陳潔儀,也因節目合約上明文規定要有微博戶口,她才跟著做。
「嗰陣時諗, OK,做完個節目咪閂 account囉。」
然後,因好多人( 43萬人)關注,自覺突然結束營業又有點過份,只好繼續。
「我覺得生命係有節奏感,好似衝浪咁, go with the flow,明明呢個時候無浪,你做咩去衝呢?咪喺沙灘度休息。但有浪嚟,點解唔去衝呢?唔順勢去?」
也許現在沒有唱片公司的她,自己工作自己負責,才有這種「豁達」的口氣。
「依家會覺得 control喺自己手上,雖然好辛苦,但會知道自己做緊乜嘢,會睇到個盡頭。呢幾年做嘢都好開心!」


離地
 

自由人身份令她可以想做就去做, 07年她竟然「紆尊降貴」做公關,也有她的私人理由。
「我未讀完書就出唱片,一出嚟就係做 artist。好好彩, so called紅咗,一路都俾人錫住,有一種好唔踏實感覺。」
當年她三十有多,突然有天思考人生應是一回怎樣的事,回想身邊由中一認識的好姊妹淘,當聊到工作話題,都被她們用「你識咩?」表情回應,她決定「落地」工作。
「我哋成班咩都講,但每次講到工作難處,我會話你應該咁樣同老闆講,朋友會唔得。慢慢佢哋都唔騷我意見,仲話:『你活喺嘅世界係假嘅。』」
之不過,公關工作只做到 09年,她還是重回「假的世界」。其後她搞過演唱會, 11年自資推出翻唱碟, 12年跟拍拖十多年的金融機構主管結婚。難怪事業不太有野心,只因愛情順心吧,而丈夫跟她甚有共識,從沒想過要有下一代。
「我真係冇興趣做媽媽!
「我哋五個好姊妹,只得一個做咗媽媽,試過講奶粉話題,大家起哄:『一罐奶粉點解要咁貴?好心俾細蚊仔食平啲啦,你縱壞晒!』,之後一有關細路仔話題,大家索性唔講。」

00年
當年電視劇還有影響力,陳潔儀做過急症室醫生,今日林保怡在劇中轉行做的士司機了。

01年
那年,跟蘇永康合唱的〈來夜方長〉,是 K房合唱必選歌曲。

15年
去年,北上參加《我是歌手》,被觀眾淘汰成為熱話。

16年
其巡迴演唱會在內地開了好幾場,終於輪到香港了。


後記
 

Kit Chan
深藍色綴條子裙邊連身裙$53,000
Bottega Veneta
黑色高踭鞋
Kit's own

話題惟有回到演唱會上。
「我比較 old school,唔想演唱會搞到好似綜藝節目咁。純粹跟廿二年前一樣,只希望每次演唱都更有味道。」
正如,訪問開始時,她以為是排排坐的傾談,沒料到會有攝錄機拍着。
「我好享受同平面(媒體)記者坐得好近,好似大家飲茶傾偈咁。依家因為有部機,令到中間有好大距離,講嘅嘢同平時一定爭好遠。」
作為紙媒工作者之一,當然明白她的意思。然而,我們都敵不過面書 timeline的洗版,作為《 ME!》最後一期,在此感謝也感激大家(被訪者)曾經近距離的剖白,後會有期。

Shop List
Alice and Olivia 中環國際金融中心 3078B號鋪( 2234 7253)
Bally 尖沙咀九龍站 Elements1040號鋪( 2834 8872)
Bottega Veneta 中環置地廣場 G06-07號鋪( 2973 0882)

撰文:黃鑑江
採訪: Judy Chu
形象: Carmen Chan
攝影: Ray Siu
化妝: Vinci Tsang
髮型: Bowie Lo